كتب احمد حافظ الصحفي بجريدة الأهرام والمهتم بشئون التعليم شهادته حول تطوير التعليم الفني في مصر ودوره في الفترة القادمة في تنمية الاقتصاد المصري وكذلك دور الدولة المصرية في هذا التطوير .
كلمة حق:
التعليم الفني في مصر، رايح في حتة تانية خالص.. نسف كل المناهج القديمة.. نسف كل التخصصات القديمة.. نسف طريقة التقييم القديمة.. مفيش طالب هيتخرج وياخد شهادة وهو مش مؤهل لسوق العمل.. مفيش طالب هيتخرج وهو مش مهاري وفاهم في تخصصه بطريقة تخليه يشتغل أول ما يتخرج.. مفيش تخصص هيفضل وهو ملوش وظيفة.. هيبقى كل تخصص له وظائف، وغيره كدة يتمسح بأستيكة.. المتفوق هيدخل جامعة تكنولوجية وهيبقى أحسن مهندس في كل التخصصات.. فكرة الدبلوم دي نفسها هتتنسف، مش هيبقى التعليم الفني لضعفاء المستوى أو للي مقدرش يدخل ثانوية، هيبقى فعلا حاجة محترمة بحيث تكون المدارس الفنية هي اللي بتخدم على كل المشروعات القومية بالدولة في كل المجالات بلا استثناء، حاليا ومستقبلا.
= الكلام ده بيحصل حاليا بمشاركة وزارات التعليم والتخطيط والتجارة والصناعة والتعاون الدولي والهيئات الدولية اللي بلادها العظمى رقم واحد في التعليم الفني (أمريكا- ألمانيا- الصين- اليابان - فنلندا) + رجال الأعمال وأصحاب المصانع والشركات الكبرى، محليا ودوليا.. علشان نوصل لمرحلة إن المدارس الفنية تكون هي العمود الفقري لتوطين الصناعة وأساس التنمية وقوة الاقتصاد والتوظيف وتكنولوجيا الصناعة.
أنا شاهد على إن اللي بيحصل وهيحصل في التعليم الفني عظيم جدا شكرا لكل رجال التعليم الفني على المجهود الضخم اللي بيتعمل في صمت تام .